【超治愈】陳氏一家五口出巡 各有各可愛

20160723
東網電視
更多新聞短片
陳氏一家五口真係超有愛同超可愛呀!
圈中恩愛夫婦陳豪及陳茵媺,昨日傍晚約六時帶同長子陳梓燁,次子陳浩鋒及細女Camilla,一家五口齊齊出巡中環,而Camilla更是首度被捕獲。
他們於兩名傭人陪同下,由一幢滿布醫務所的大廈步出。而起初他們的陣容是,陳茵媺抱着Camilla,陳豪抱着次子浩鋒,大仔梓燁則由兩名傭人照顧。不過由於梓燁實在太奀皮,全程係咁跳跳紮,仲逐級樓梯係咁跳,搞到拖住佢嘅兩位姐姐冇晒符。而行喺前面,覺得唔對路嘅陳豪,即時「轉身射個三分波」,一手抱住細仔,一手拖實大仔。而陳豪嘅大手一出,梓燁果然聽聽話話,冇再跳紮紮,呢位爸爸果然非常厲害。
囡囡同阿媽餅印咁款
至於全程抱住囡囡嘅陳茵媺,佢就好忙喇,佢一嚟就要避免愛囡曝光太多,二嚟又要睇住老公同另外兩個仔,不時行一步又回望一吓咁,但難得佢依然全程保持燦爛笑容,咁甜美嘅人母,抵佢咁受歡迎。雖然陳茵媺勁保護Camilla,但根據現場觀察,Camilla雖然人仔細細,但已長得十分標致,更與靚媽陳茵媺餅印咁款。
次子瘋狂揮手
之後,陳豪就忙住先後送阿仔同老婆同阿囡上車。呢個時候,值得一提嘅係次子浩鋒,佢由現身一刻開始,已經不停扮演親善大使,不停向鏡頭自動波揮手,佢一直係咁揮、係咁揮、係咁揮,加上有少少天然呆,真係可愛到一個極點。而佢臨上車之前,仲表演扮飛機係咁揈對手仔,真係睇到個人個心都融化晒!
陳豪掩護老婆
當陳茵媺同阿囡都上埋車,陳豪終於鬆一口氣,諗住可以走人,不過期間佢哋嘅女友人路過,喺車邊同陳茵媺傾咗幾句,而陳豪呢個時候就有少少掩護老婆,可能都係唔想阿囡咁細個曝光太多。擾攘咗一輪,陳氏一家終於離開,而觀乎陳豪全程都好顧家、好Man,令到佢嘅好好先生形象再次攀升。
最強娛樂APP《東網巨星》,不時推出最新最好玩娛樂節目,除了早前推出的特備節目《發哥有Say》、《黎明話你知》外,每個禮拜都仲有好多其他精彩娛樂節目。預知未來,相信好多人都希望做到,《東網巨星》APP其中一個重點節目《玄學星相》,除咗教識大家點樣催吉避凶,仲會以玄學角度,幫大家八盡每周娛樂熱話㗎!
最強娛樂APP「東網巨星」下載連結: