【全部新衫】黎明自嘲着得太多

雖然黎明喺澳門新濠影滙綜藝館舉行嘅演唱會，唱嘅歌同香港個show差唔多，但黎明真係絕冇欺場，佢今晚嘅歌衫，全部都係之前未見過嘅，而且套套都咁有型，令人眼前一亮。而黎明唱唱吓歌時仲發生小插曲，事緣着晒西裝、打晒煲呔嘅佢，唱唱吓嘅時候，個煲呔突然「吊吊揈」，畫面勁有趣。

男歌迷狂叫「我愛你」

黎明唱完《我愛Ichiban》之後，台下嘅粉絲當然係不斷尖叫啦，黎明即話：「你哋講啦，我聽到㗎喇。」有男歌迷即場大叫「我好愛你呀」，而其他人就繼續不停尖叫，黎明亦不斷揮手，氣氛好熱鬧。

企圖着Tee

之後黎明再話：「夏天一到，你哋對我幾好，全部着晒好多衫嚟。」到底黎明點解咁講呢？根據現場記者對佢多年嘅認識，估計佢嘅意思係大家陪佢一齊着咁多衫，因為黎明呢個騷啲衫全部都幾厚吓，之後黎明又話：「我知我個煲呔甩咗，台下有人指畀我睇。」然後佢又問：「如果我着Tee，你哋係咪唔介意？但冬天就唔好喇，要着番件褸。」真係搞笑。