巔峰對決！彭于晏金城武鬥Chok電死人

依家修圖APPS愈嚟愈多人用，搞到周街都充斥住「女神」、「男神」，呢啲稱號真係泛濫晒。不過，正所謂「假的真不了，真的假不了」，台灣兩大男神彭于晏同金城武近日拍攝新廣告，佢哋淨係行出嚟都已經令人心跳加速、呼吸困難，呢啲咪先係「真‧男神」囉！

先講男神彭于晏，佢最近拍攝眼鏡品牌嘅廣告，搞到全城女士為之瘋狂，仲勁誇張咁話：「打開廣告呢30秒，我個世界停頓咗！」片中男神身穿西裝，戴住墨鏡CHOK甫之餘，又伸脷誘惑人，連小編都睇到面都紅晒！之後男神仲運用佢一對煞食嘅迷人電眼，對住鏡頭放電，網友們都被佢電到暈佗佗，仲變得呼吸困難：「唔該畀個氧氣罩我，我就快窒息，點解彭于晏可以咁靚仔咁性感？」

相信睇完男神金城武嘅新廣告，大家又要多個氧氣罩啦！久未露面嘅佢拍攝鐘錶品牌嘅廣告，一開首見到西裝骨骨嘅佢坐喺車上，雖然一臉陰鬱，但依然電力十足！之後男神離開架車，用佢對超超超長腿輕輕一爬，成功爬上大橋去俯瞰美景，雖然呢個係危險動作，大家切勿模仿，但男神咁做真係型到跌渣！有網友更大讚42歲嘅男神依然咁有型，認真係男神中嘅典範！

網民有話兒：

KarmenXXX：呢30秒，我個世界停頓咗！

Jian_WXX812：唔該比（畀）個氧氣罩我，我就快窒息，點解彭于晏可以咁靚仔咁性感？

X嘉文：忍不住舔屏。

GabrieXXX：金城武咁多年嚟都咁有型，男神就係男神！

XXXXLibinKoh：不得了，彭于晏同金城武都咁靚仔點揀，可唔可以WHY NOT BOTH。