41歲林志玲風騷晒花　網友：公開戀情嗎

現年41歲嘅台灣女神林志玲係圈中黃金盛女，感情方面一直撲朔迷離。不過女神樣靚身材正，又點會冇仔仔鍾意？最近唔知係咪有男士開行Turbo力追，林志玲一連兩日喺微博晒出收花相，好似今朝咁，林志玲喺微博晒出自拍大頭相，又手捧一盆花表示：「星期一囉～大家帶着快樂心情上班喔～」好風騷吓啵！

而尋日，女神就晒出一張收紅玫瑰嘅相，並謂：「剛才收到一束有誠意的花～謝謝」謝謝？謝謝邊個先？一班網友冇將焦點放喺玫瑰上，眼利嘅佢哋反而發現林志玲戴住嘅黑超倒影有個男人幫手揸機影相，不過觀乎個男人嘅身形，就唔多似緋聞男友言承旭，於是大家都好好奇嗰個男人係邊個，仲有人問：「這是告訴我們名花有主了？」、「要公開戀情嗎」，其實網友咁緊張都唔係冇道理，好似台灣女星林心如，喺5月20號嗰日都係突然晒花認愛，唔知今次林志玲會唔會又係玩呢招呢？