王菀之廢車場化身鬼新娘玩火

20160725
東網電視
更多新聞短片
睇個裝都夠驚嚇。
歌手王菀之(Ivana)化身紅衣鬼新娘為新歌《該死的快樂》拍MV,穿上紅色全身裙配合鬼新娘的妝容,白白的臉蛋和紅色的眼影,與戴着紅色頭飾的愛人,在廢車場裏的一架紅卜卜的房車裏談情,兩小無猜玩手指又四目交投,仲開心到跳舞,狀甚浪漫,不過當他們木無表情冷眼看着房車陷入火海時,氣氛令人不寒而慄!
雖然在炎炎夏日高溫下拍攝,但Ivana表現專業好投入,接受訪問時還自稱是未來人,紅卜卜的大房車道具是她的閨房,後面高到成座山的汽車零件是她的衣櫃,還有一堆堆的廢車就是她的私人遊樂場。
MV玩黑色幽默
過往Ivana的MV仙氣十足,今次大逆轉玩黑色幽默,她說:「由妝容到拍攝嘅地方都同我平時拍MV嘅感覺好唔同,反差好大,呢首歌叫《該死的快樂》,淨係聽歌名都知勁啦!以往我填詞用字比較溫柔,而今次由黃偉文填詞,佢用字立體而且暗陰。雖然係咁,但其實呢首歌一樣好正量;好有生命力嘅訊息。就好似呢度周圍嘅嘢,表面係廢物,但拍出嚟好多質感,好有生命力。歌詞係講,我哋好多時為咗得到一刻快樂,要經歷好多好多不快樂,值得嗎?但當你真係得到嗰一刻快樂時又好似值得思考。」咬緊牙關捱過眼前呢刻痛苦,成果就在咫尺。