娛樂專題：歐陽震華片場當遊樂場
20160726
東網電視
更多新聞短片
寄工作於娛樂，好嘢！
歐陽震華（Bobby）的劇集為觀眾帶來不少歡樂，但拍劇開工，一連數個月日以繼夜忙不停，有時連樂觀的他也感困惑。今次與比他更爛玩的「老友記」胡楓合作，就令他有所啟發，學懂一套「遊樂場」快樂哲學。
冇乜錢使...所以可以好瀟灑
「之前睇《贏在起跑線？》，見到啲媽咪同細路好大壓力，有個家長話香港只有兩種人可以瀟灑，一係冇樓，一係冇小朋友，因為有樓就畀層樓綁住，有小朋友就畀個社會綁住，我兩樣都冇，冇經濟負擔，又有地方住，咁我就可以瀟灑喇！
我嘅生活好簡單，一日幾餐都食得好簡單，唔使餐餐都食好嘢嘅，好嘢多數有人請，哈哈！匿喺屋企鹹魚青菜都冇所謂，又冇乜錢使，係有時買吓玩具，四個轆玩吓款，咁又唔係要買啲幾百萬嘅車，有啱先換，都係有限錢。不過，近年去多咗旅行，以前後生冇經濟能力嘛！不過想去嘅地方都去咗，我又畏高呢！好怕搭太長途嘅飛機，近年都係鍾意去近近哋嘅地方，唔好太遠，4、5個鐘頭機就最好，尤其係台灣，一年去幾次，去食吓嘢、按摩、瞓吓覺休息吓，台灣應該搵我做旅遊大使啦！」
珍惜舊物...唔係舊嘅就唔好
愛玩的Bobby遇上比他更爛玩的「老友記」胡楓（修哥），有時亦難以招架！不過，由胡楓身上卻學到一套「遊樂場」開工哲學，對Bobby大有啟發。
「平時見我對住鏡頭好開心，但有時拍幾個月戲，日日要返工，其實都好攰、好想抖吓，係心情同思想嘅問題，都會鬥爭得好緊要。我請教過修哥呢個問題，修哥咁嘅年紀，有孫、有塞，唔使憂柴憂米，我問佢用咩心情返工，佢話當自己係小朋友去遊樂場，好似返嚟玩咁。我問佢有冇諗過退休，佢話唔會，退休好快死(口架)！修哥就係用呢種心態做嘢，有人畀埋錢你去玩喎！幾開心呢！我都開始轉變，用修哥呢種遊樂場心態去做嘢。
修哥開工嗰陣爛玩過我，佢雖然八十幾歲，但腦筋好清晰、好靈活，有時佢一句窒埋嚟，連我都唔知點答。最搞笑係佢開工嘅時候，鍾意周圍攝啲睇完嘅劇本！佢開工淨係帶嗰日嘅劇本，一路拍一路撕，然後周圍攝，初時好多地方可以攝(口架)，但拍到後尾，大家發覺個廠都係修哥睇完嘅劇本。
修哥成日見我拎住個鐵箱，笑我『咁重，你睇吓我幾輕便』，其實個箱跟咗我十幾年，用嚟裝劇本、化妝袋，仲可以裝兩對鞋，等埋位又可以坐，依家冇出咁笨重嘅款，當做運動囉！呢啲箱愈舊愈靚，嘢唔係舊就唔好，有時舊仲好過新。」
睇老戲骨...睇嘅係人生閱歷
去年拍《一屋老友記》時，Bobby已貼胡定欣做「視后」，可見他眼光獨到。劇集收視好除了演員合拍，Bobby認為現時的觀眾特別喜歡欣賞老戲骨散發的人生閱歷。
「同胡定欣識咗好多年，最記得第一次同佢傾偈，佢喺停車場問我借『過江龍』，因為佢架車冇晒電，嗰陣佢仲係小妹妹，估唔到依家可以做拍檔，我停咗喺度等咗佢好耐，終於等到佢，哈哈！好多人都問我收視有冇壓力，冇(口架)！拍咗就算，做咗我本分，慶幸套劇收視都見得人。其實依家啲劇唔係淨係睇收視，因為太多途徑去睇，講口碑最直接，我都有睇《純屬意外》，幾好睇喎！依家香港啲觀眾唔係唔睇劇，係會揀人睇，鍾意睇啲有人生閱歷嘅老戲骨，好似修哥、啟華、我都算係嘅，睇戲其實係睇呢班人嘅人生閱歷。」
後記：
經常見Bobby着闊浪褲，原來他是闊浪褲的忠實擁躉，喜歡它舒服、易穿、容易配襯，着過後便上癮。Bobby每次到台灣，也會到一間專賣闊浪褲的舖頭掃貨，有次更掃齊舖內所有款式，認真誇張！
場地：Coast Seafood & Grill（銅鑼灣）
最強娛樂APP《東網巨星》，不時推出最新最好玩娛樂節目，除了早前推出的特備節目《發哥有Say》、《黎明話你知》外，每個禮拜都仲有好多其他精彩娛樂節目。如果鍾意韓風嘅，集中介紹最新韓劇、韓片同韓國最新歌曲嘅《韓劇榜》，同埋Highlight每周韓星訪港精彩片段，以及報道韓國演藝圈最新動態嘅《韓風吹》絕對啱晒你。仲諗咩呀！快啲Download啦！
最強娛樂APP「東網巨星」下載連結：