【你信？】36E陳婉衡自爆做過肥妹仔

無綫新一代咪神陳婉衡（Alycia）fit爆身材惹人遐想，她直言以往工作外勤時曾遭非禮！為避開男士們的注目禮，她表示平日上街喜歡闊身衣着打扮，實行禾稈冚珍珠，減少不必要麻煩。談到其36E上圍，她笑謂﹕「我婆婆仲勁呀，咁都同我發育時吸收足夠營養有關嘅。」

曾經係肥妹

很難想像，Alycia曾經是肥妹仔一名，且十分抗拒做運動：「試過去到130磅。肯做運動嘅開始，係喺溫哥華學高溫瑜伽，發覺流汗嘅感覺好正，之後就學埋鋼管舞、空中絲帶等，近呢半年朋友仲介紹埋我健身，平均一星期起碼做（運動）足3、4日。依家勤做運動唔係只為自己，係想帶多啲正能量畀身邊人。」

畀人搣Pat Pat

Alycia的豐滿上圍乃家族遺傳，百分百天然！她笑說：「總之我唔及我媽媽，我媽媽又唔夠婆婆咁犀利啦。我發育時期又真係偏肥嘅，吸收到足夠嘅營養都有影響。」擁有同性艷羨的魔鬼身材，Alycia亦有有口難言的煩惱，原來以往為娛樂新聞台外出採訪時，曾遇上鹹豬手，令她相當無奈：「當時一班外籍男士喺我身後入鏡，忽然覺得有隻手喺我pat pat上搣咗一吓，我望去後面都唔知究竟邊個先係『兇手』，大會後尾幫我翻睇閉路電視，終於知道係邊個所為，但人一早逃之夭夭啦。」

鍾情運動男

台上的Alycia不介意盡騷S身形，原來私底下她卻愛作闊身T恤打扮：「咁樣打扮舒服好多，同埋唔會咁多人望住晒。」為保持身段，她坦承要「揀嘢食」，澱粉質尤其要謝絕，但卻不接受自己過「無味人生」，所以一星期會放自己一天假：「嗰日會約朋友食飯，鍾意食乜就食乜囉。其實要有健康飲食，先可以補充體力做運動嘛。」問到單身的她日後選擇男友，會否首選運動型，她即答：「會呀，外形反而唔係咁緊要。大家一齊去運動、行吓山咁已經好滿足，又可以慳番啲拍拖錢。（有追求者？）都有男性朋友嘅，總之最緊要大家相處舒服。」

泳衣提供：一田百貨

運動服提供：Titika Active Couture