出寫真驚滯銷　黃心穎將性感留畀另一半

藝人黃心穎、張秀文及李佳芯等於將軍澳電視城錄影無綫節目《學是學非》。心穎笑言難得齊人開工，希望節目長拍長有，甚至能有劇集版。問到日前傳內訌的眾女若開劇是否繼續「針鋒相對」？心穎笑言最好每人安排猛男做對手戲，以免出現爭仔局面：「如果開劇畀我哋要搵6個男仔，一人一個唔使爭！」

擔心出寫真滯銷

提到其拍檔張秀文計劃影寫真大晒34D身材，問心穎有冇興趣倣效對方？她笑言擔心若出寫真會滯銷：「我有諗過，但驚冇人買。我未必可以咁性感，因為我覺得性感一面應該留畀另一半。（你未有緋聞男友幫你影寫真？）我冇呀，或者靠自拍影寫真啦！」

而心穎又透露將與曾志偉、洪天明及錢嘉樂等主持節目《我愛香港》。她笑言預計會被玩謝：「佢哋咁好口才，我應該插唔到嘴。（預咗做『下靶位』？）冇得揀，但我心甘情願。可能我玩番佢哋，放馬過嚟！」