讀小學操場驚現大窿　朱千雪以為世界末日

藝人朱千雪、黃德斌、王卓淇、蔣家旻、楊潮凱及羅天宇到西九龍中心，宣傳明珠台8月5日起播映的新一輯《X檔案》。

千雪分享一段「外星」往事，她說：「細個喺外國讀小學，有朝早操場出現個大窿，話係殞石撞落嚟形成，冇人受傷，但嗰時細個覺得好大件事，以為世界末日啦，好彩後尾都冇事，我信有外星人，慶幸我未遇到過，如果唔係我實驚青到唔識應對。」

黃德斌被錯認秋生

德斌則說：「我對外星人半信半疑，因為未真正見過，都係睇戲同聽人講。（頭先司儀蔡康年嗌咗你做秋生，覺唔覺不可思議？）哈哈哈，佢玩啫！」

德斌提到將要接受體能大挑戰，他說：「嚟近會幫公司做個節目，詳情要等公司公布，呢排開始要練體能，係好劇烈嘅訓練，好辛苦，自己都會睇住自己情況，太犀利嘅，會搵人喺側邊睇住我。」