同舊愛復合有機　孫慧雪自認專一唔收兵

藝人孫慧雪作cosplay打扮，與網絡紅人「爆機達」齊齊現身動漫節宣傳，鬥機時阿雪「蠻拳打死老師傅」勝出，令「爆機達」無言兼無癮！

談到與舊愛Edwin Lo被指「假分手」兼同居，阿雪坦言：「我哋真係分咗手大半年，分手有好多原因，而分手後傳媒就不斷將佢啲相放上網，搞到佢有少少驚！我哋依家係有見面嘅。（有機會復合？）係，真係唔捨得。」

結婚對象

對於Edwin，阿雪讚口不絕，直言給予對方100分：「佢喺我呢個歲數遇到最好嘅。（視對方為結婚對象？）咁嘅年紀都會諗呢樣嘢。（有傳妳唔抗拒其他追求者喎。）我真係唔係呢種人，好專一，唔收兵只收觀音。（佢信妳？）係，佢對我絕對有信心，咁多年我身邊只係得佢一個！」

有指早前二人被拍到當街鬧交，阿雪解䆁說：「唔係我哋嗌交，係有架貨車閘住咗我哋架車，個司機落車狂影相，又話識記者又叫我哋報警，所以我哋好無奈就真。」