朱千雪大讚李雪瑩未婚夫勤力兼叻仔

前港姐李雪瑩（Crystal）昨日在網上宣布婚訊，大晒與未婚夫的貼頭合照之餘，更在相中大騷左手無名指上的超閃鑽戒，令人隔住個Mon都感受到她的幸福。好友朱千雪亦有留言送祝福，更大讚對方是靚靚新娘。而朱千雪透過電話向《東網》透露，指自己亦是日前才知道好友訂婚：「之後佢就喺網上公布喇。（你識唔識佢未婚夫？）未識，之前話約食飯，但暫時仲未約到，但都聽Crystal講好多（有關未婚夫）。」又謂Crystal與未婚夫經常周遊列國。問Crystal男友是否富二代？朱千雪謂：「咁我唔清楚，但我知佢要返工嘅，好勤力又幾叻咁。（幾時到你嫁人？）我唔知喎，我有就會喺微博講！」