【同屆港姐唔知情】張名雅急嫁律師男友

藝人陳庭欣出席活動被問到前港姐李雪瑩與圈外男友訂婚時，她竟然爆料指圈中將再有港姐有喜事，庭欣笑說：「都係港姐嚟嘅。（同屆港姐？）唔講得，總之佢都結得急。（大肚？）我唔知，但佢另一半唔係圈中人，佢就嚟宣布啦，我姊妹裙都試埋啦！」原來，這位即將結婚的港姐就是張名雅，現年28歲的張名雅正與圈外律師男友JOE交往，二人早前被拍到打得火熱，更於社交網站高調晒愛。而《東網》致電名雅時，她表示正忙於工作，稍後再回覆。之後，張名雅回覆《東網》，並親口承認男友已求婚：「男朋友係求咗婚，我都應承咗，好開心，係一件開心嘅事，再有乜嘢會通知大家，多謝大家嘅祝福。其實婚禮都籌備咗好耐，佢（男友）好有計劃，好感動到我，我哋都想有多啲空間，可以各方面都準備得好啲。（咁快結婚係咪有BB？）BB呢啲咁長遠，唔講嘞！做好眼前啲嘢先，結婚已經好多嘢搞，已經好忙。」

而同屆的港姐朱千雪與黃心穎，都表示未知情，千雪表示：「佢有拍拖咩？恭喜晒。（真係唔知？）我完全唔知呀！因為我前排都忙返學。」心穎則說：「我都唔知呀，大家私下好少聯絡，近排有留意新聞，知道李雪瑩結婚，都有留意名雅公開咗有男友，估唔到進展咁快囉！（試咗姊妹裙？）冇呀，唔會搵我啩！（港姐結婚潮冇你份？）唔會啦，我唔急呀！」