張嘉兒拍片力數「超不推薦的產科醫生」

作為準媽媽嘅藝人張嘉兒自從懷孕之後，就喺社交網站開設專頁，同各位準媽媽分享佗B心得，教大家懷孕嘅時候要注意啲咩。而嘉兒今日就喺微博上載咗一段短片，分享懷孕初期睇醫生嘅不快經歷，仲以「超不推薦的產科醫生」為題，力數該名醫生三大罪狀，就係八卦查家宅、唔專業、同埋問咗等於冇問。

雖然片中嘉兒冇提及醫生同診所嘅名，但睇得出呢個經歷令佢覺得好唔舒服。佢話經朋友介紹去咗中環一間婦產科診所驗孕，雖然價錢貴，但因為評價好所以想去睇。由於朋友推介嘅嗰位醫生太出名，已經Full booking，所以嘉兒就喺姑娘嘅介紹下，試吓同一診所嘅另一位醫生。

八卦醫生查家宅

片中嘉兒提及由於懷孕需要成日睇醫生檢查，所以搵合適同夾嘅醫生好重要：「可能你哋會覺得好小事，揀醫生真係人夾人緣，如果同呢個人唔夾，就係唔掂。」之後佢繼續講：「最初問吓我同屋企人有咩病歷，或者呢胎係計劃懷孕，抑或係意外。跟住問我做咩職業，知道我做演員之後，就問我拍劇辛唔辛苦，拍咩角色，使唔使拍通宵，但呢啲唔係睇醫生會問你嘅問題。你嗰陣嘅心情唔係想佢問呢啲嘢，已經覺得佢好八卦，仲要問埋我家姐結咗婚未、有冇BB，好似侵犯我私隱咁，覺得唔舒服。」

張嘉兒嬲醫生唔夠專業

不過嘉兒都覺得以上係小問題，繼而續說：「最大問題係我有多囊卵巢症，每月經期唔定時，會引致難懷孕，所以擔心會唔會好易流產。當問到我關心嘅問題時，佢好寸咁話Scan咗咪知囉。本身已經唔鍾意佢問我啲私人問題，嗰一刻真係好嬲！我明白醫生唔想令到病人恐慌，但其實佢應該用數據去分析我聽。」

嘉兒又話之後驗咗真係有咗BB時，雖然個醫生有恭喜佢，但個恭喜都唔係好熱情，又話個醫生全程要佢自問自答：「好多人都知海鮮唔食得，我都有呢個正常知識，但都會想問吓醫生意見，但我好似係自問自答咁，吓吓我答番佢，其實自己上Google都得啦！」