小倉優子懷第二胎　老公疑偷嗒同門師妹　

日本藝能界嘅不倫風波可謂一波未平一波又起，今日輪到前水着女星小倉優子嘅著名髮型師老公菊池勳，被雜誌踢爆疑背住正懷有第2胎嘅優子出軌，對象更加係妻子嘅同門師妹偶像，認真大膽！

現年32歲嘅優子，月前上電視節目大呻對老公嘅不滿，她自爆兩夫婦隨住2012年誕下長男後變得多嗌霎，又指老公經常不在家，因而惹來婚變傳聞，當時優子否認，加上6月她宣布再度懷孕，才叫外間稍為放心。豈料明日出版嘅新一期《週刊文春》雜誌，在7月7日拍到菊池出入優子同門師妹偶像組合Yururirapo嘅25歲長腿成員馬越幸子香閨！

菊池面對雜誌記者直擊時否認搞不倫戀，但回應得有點不知所措，表示會跟妻子交待一切，希望妻子能相信他，又表示會道歉。

至於馬越幸子未知是否受報道影響，其網誌及Twitter已刪走，而所屬事務所則表示她正在反省，今後所有應對同安排都會最優先考慮優子嘅心情。不少網友都對優子表示同情，並擔心消息會否對其正在佗B的身體帶來影響。