【見過鬼怕黑】蕊蕊守齋兩年唔吼圈中人

歌手蕊蕊今年四月同金剛分手結束近三年情，日前佢去咗沙灘挑戰玩滑浪風帆，寓意乘風破浪揭開人生新一頁！樣靚身材正、擁有34F驕人上圍嘅蕊蕊，回復單身之後身邊的確出現唔少追求者，當中更有韓國Oppa希望可以奪走佢嘅芳心，不過事業線同事業心同樣重嘅佢，就堅決兩年內向戀愛說不，皆因想喺事業上搏殺。

蕊蕊就話：「自己年紀都唔細，所以想投入工作，未來都有新方向想嘗試。（冇諗住拍拖？）未來兩年都冇打算拍拖，真係唔想諗兒女私情，想認真工作。」蕊蕊雖然自爆有韓國Oppa追，但佢好坦白咁話淨係愛本地仔仔：「係有Oppa追我，但我自己都偏向鍾意香港男士，但唔會再同圈中人拍拖，真係怕怕啦！」

拒異性入香閨

現時重新出發嘅蕊蕊，除咗專心工作外，更已經搬離昔日愛巢，雖然係咁，佢仲好大方幫舊愛Keep住啲嘢，蕊蕊話：「依家心情完全冇嘢，已經過咗幾個月，多謝大家關心，雖然佢啲嘢仲喺我度，但大家冇聯絡，可能佢都需要啲時間啩。」另外，蕊蕊為咗布置新居花咗唔少心思，同時更因為咁而整傷手腳：「我着住短褲移枱移梳化，搞到手腳都刮傷撞瘀。（唔叫啲追求者幫手？）呢啲嘢梗係自己做番啦！我唔會隨便畀任何異性上嚟屋企，我唔係咁隨便！」