佐佐木希演殺人狂晒爛背　刺激收視微升

早前跟諧星渡部建傳出緋聞嘅日本女模佐佐木希，喺男方在各大場合表明無結婚意欲嘅情況下，佢近期在工作方面表現搏殺，除日前宣布性感上陣拍新寫真集，又為昨晚播放嘅波瑠主演劇集《ON 異常犯罪搜查官 藤堂比奈子》做串星，洗脫高貴斯文形象，挑戰連續殺人魔角色。

當中有剝衫大晒爛背場面嘅希妹，故事講述佢殺死4名少女，藉以取得她們的肌膚為自己打造新外殼，其後佢再將刺殺目標轉移至飾演刑事嘅女主角波瑠。過去經常入圍演技最水皮女星之列嘅希妹，今次憑住兇狠演出叫一眾劇迷留下深刻印象，並成功刺激劇集收視微升了0.6%至8.8%。至於同時段打對台嘅瀧澤秀明與武井咲新作《毫無保留的愛》，雖然收視亦告微升至6.9%，但仍然連續4個星期不敵波瑠。