復合冇望？胡定欣否認逼婚分手冇第三者

「視后」胡定欣、陳展鵬、劉佩玥（Moon）及伍允龍等於紅磡宣傳無綫劇集《城寨英雄》。當中定欣及展鵬玩遊戲時，除了埋身「合體」玩sit up，定欣更生擒對方，表現風騷！而緋聞男女Moon及伍允龍則示範「女上男下」掌上壓，炒熱全場氣氛。

冇負面情緒

日前與音樂人陳明道分手的定欣全程表現投入，她更淡定談及情傷。定欣表示早前放假「叉足電」，又謂分手後並沒有負面情緒：「個假期一早定咗，去到飲吓同食吓。（有冇喊吓？）冇喇，唔係第一次拍拖。每次經歷令自己成長，冇負面情緒。（放得低？）冇嘢放唔低。我知大家擔心同關心我，但放心，我大個女喇。」

唔講邊個提分手

提到有傳定欣因有第三者介入而分手？定欣又再強調分手與第三者無關，只因性格不合才分開，但未肯透露由誰先提出分手：「呢段感情冇發生任何唔開心嘅事，唔好相信唔真實嘅報道。」她又否認逼婚，更自認事業心重：「從來冇，婚姻點可以逼？我事業心好重，事業上有新開始。將（逼婚）字眼擺喺女仔身上唔太好，唔知嘅人會以為真。」定欣表示與前男友分開一個月但尚有聯絡，目前沒想過復合，她希望傳媒不要追訪及打擾對方。

唔諗拍拖

問她是否暫時不考慮拍拖？定欣就謂順其自然：「冇咁諗，順其自然，時候未到。（多人追？）冇。（點會呀？）好出奇咩？係咪覺得我條件好好？冇呀，呢排忙住宣傳。」