網民熱話：林穎彤萌爆孖辮Look升呢女神

近日熱播嘅無綫新劇《城寨英雄》搵咗好戲之人陳展鵬、胡定欣、袁偉豪等演出之外，仲搵埋好打得嘅伍允龍同元秋齊齊維護城寨嘅和平。

牡丹雖好都要綠葉扶持，劇中除咗幾位主角使出真功夫，打得精彩好睇外，一眾配角嘅演出都值得細味一番，當中飾演理髮店員工李懷鑫（林穎彤飾）嘅演出更加令人眼前一亮。佢包包面，一雙大大嘅眼睛，雖然唔稱得上大美人，不過獲唔少網民大讚「小可愛」。劇中嘅鑫鑫紮起孖辮清純可愛到爆，同現實中佢嘅「小可愛」形象相當配合，火速成為宅男心目中嘅女神。

劇中受盡凌辱

不過林穎彤喺劇入面嘅命運勁慘情，畀惡霸夏滿（李嘉飾）睇中，成日走去理髮店對佢毛手毛腳，受盡凌辱。尋晚嗰集（第三集）佢仲畀佢嘅爛賭獸父當人球，賣咗畀夏滿償還賭債。之後鑫鑫嘅命運繼續坎坷，被禁錮喺窄小嘅鐵籠入面，畀人係咁恐嚇之餘，仲攞生雞蛋照頭淋。鑫鑫楚楚可憐嘅樣，即時搏得網民同情，大鬧個衰老竇冇人性，想打爆部電視，拉佢出嚟打咁話。之後鑫鑫仲差啲畀人污辱，好彩緊急關頭陳展鵬、胡定欣同伍允龍殺到，將佢由虎口入面救番出嚟。

鑫鑫早死網民嗌唔捨得

但係鑫鑫嘅慘情命運沒有最慘，只有更慘！有網民話過多幾集，佢就會畀人輪姦至死，有網民仲投訴：「鑫鑫咁快死…有無（冇）搞錯呀！點做編劇㗎，好嘅演員應該比（畀）多啲機會人哋。真後覺得好可惜，之後無（冇）機會見到佢，好唔捨得。」有網民則安慰道：「其實天下無不散之筵席，佢今次雖然演出好短暫，不過都得到唔少人注意，對佢嘅星途有好大幫助，我哋期待佢下一套作品啦！」

網民有話兒

YXxipCnx Yexxh x Yan： 太可恶（惡）的爸爸啊！

Axprxil Cxxan xxan： 這套劇可以回看九龍城面貌，又可以認識以前生活態度點滴，又笑得又打得，仲有泰文學。好睇支持呀！

MagxxHx： 個衰老豆（竇）太無人性，好想打爆部電視，拉個佢出嚟打。

吳x兒： 鑫鑫老豆（竇）正人渣。

最強娛樂APP《東網巨星》，不時推出最新最好玩娛樂節目，除了早前推出的特備節目《發哥有Say》、《黎明話你知》外，每個禮拜都仲有好多其他精彩娛樂節目。如果鍾意韓風嘅，集中介紹最新韓劇、韓片同韓國最新歌曲嘅《韓劇榜》，同埋Highlight每周韓星訪港精彩片段，以及報道韓國演藝圈最新動態嘅《韓風吹》絕對啱晒你。仲諗咩呀！快啲Download啦！

最強娛樂APP「東網巨星」下載連結：

http://on.cc/redirect/entertainment