曾跟母乞食！單親林穎彤演「鑫鑫」勁感觸

藝人林穎彤（Bella）、劉佩玥（Moon）、狄易達及組合C AllStar到荃灣出席《Think Big Family》活動。最近Bella憑劇集《城寨英雄》的孖辮妹角色「鑫鑫」人氣急升，成為新一代宅男女神。劇情講述她畀衰鬼老竇當作人球，賣給飾演奸人的李嘉還賭債。「鑫鑫」除了被禁錮於鐵籠入面被恐嚇與掟雞蛋之外，期間更險遭李嘉強姦，幸好得陳展鵬、胡定欣及時殺到，成功救回。之不過，沒有最慘情，只有更慘！據聞之後「鑫鑫」仍劫數難逃……「鑫鑫」坎坷的經歷獲得萬千網民同情，不少網均被Bella精湛的演技打動，更紛紛大鬧劇中衰老竇冇人性！

知有得拍《城》瞓唔着

Bella對此直言想不到反應這麼熱烈，令她受寵若驚，她說：「好開心，其實第一日播已經好緊張，始終自己好耐冇拍劇，上一次嘅角色係《愛．回家》嘅『酸妹』，都兩年，期間主要做《安樂蝸》。收到監製電話揾我拍《城》劇，我超感動，瞓唔着！（有網友封你做女神。）多謝網民，希望大家唔止呢一次喜歡我。（之後角色嘅遭遇仲慘？）依家未最慘，之後仲危險，驚大家忍唔住喊。（戲份得7集太少？）已經好好，有完整故事，好感恩，希望之後再有拍劇機會。」

老竇有外遇走佬

劇中角色身世坎坷，現實中的Bella原來亦遇過不少挫折，她來自單親家庭，由母親獨力撫養成人，她直言說起某些對白時份外入心：「我喺單親家庭長大，爸爸喺我好細個就走咗，講到『爸爸點解唔要我』呢句對白時，特別觸動到我。」有指Bella兒時家境清貧，一歲多時更曾跟媽媽在街上行乞，Bella直言其實沒有這部分記憶，都是由母親告知：「都係由媽咪口中知道，爸爸鍾意咗另外一個，已經好耐冇聯絡，媽咪就捱苦湊大我，其實細個冇感覺，到長大咗見到其他人有完整家庭，心底係有少少遺憾，不過唔緊要，有媽媽錫我就得。」