【唱到落台】林峯High爆送抱冧粉絲

歌手林峯出席《的總愛心慈善晚會》，出場唱歌全場反應熱烈。期間他落台唱歌，歌迷更爭相影相，之後有歌迷獻花時又跟他影相抱抱，令全場尖叫。

着泳褲拍MV

受訪時林峯表示來活動前忙住錄新歌，他說：「希望八月內（推）出，係首關於夏天嘅歌，係輕快嘅歌，會跳舞，但唔會話好多Step，但大家聽到會郁吓，等大家夏天除咗捉Pokémon外，燒烤都可以播嚟聽吓。」他亦謂之後會拍MV：「係非常夏日嘅MV，好Hot嘅MV，會有陽光與海灘。（會唔會着泳褲？）沙灘梗係着泳褲，不過依家唔興着三角褲，總之會夏日，都會玩啲水上活動。（會Show Body？）盡量，不過演唱會之後肥咗十磅，食多咗，所以要Keep番，都要戒口。」林峯亦謂因為內地劇檔期延遲了個多月，故公司打算在此段時間幫他錄幾首歌，希望推出EP。

撞期拍唔到《使徒行者》續集

講到《使徒行者》會拍續集，但就沒有林峯和佘詩曼等靈魂人物，對此他謂：「基本上好多續集嘅劇或電影個故仔都唔一定係跟番原本，演員班底唔同先令大家有新鮮感，好似我之前做《溏心風暴》同《溏心2》個故仔都唔同，只係演員重複，但角色都唔同。」他亦透露其實監製有找過他，但可惜因工作撞期未能參與續集，但他表示相信日後會再合作。問到可會捧場看《使徒行者》電影？他則表示希望大家會支持。