冇時間拍拖　廖碧兒孖羅嘉良拍戲嗌熱爆

藝人廖碧兒出席活動，透露現正忙於拍攝劇集，故忙得沒有時間拍拖。她說：「嚟緊會上內地拍，雖然好近香港，不過冇時間上上落落。因為依家喺香港都每日拍兩組戲，時間好長，依家拍咗個幾月，好開心。」

孖羅嘉良拍劇獲益良多

廖碧兒又透露這次與藝人羅嘉良一齊拍劇有很多感情線，從對方身上學習了不少：「雖然都成日有飛紙仔，不過我哋睇咗剪咗嘅宣傳片，拍得好靚。」她又坦言拍攝過程十分辛苦，因天氣很熱，而且拍攝場地沒有冷氣。她說：「我哋要喺個倉度拍，我仲要着羽絨，男仔就要着皮褸。而且要現場收音，連風扇都唔開得，真係熱到暈。（有冇真係暈？）一覺得唔舒服就要行出去，大家都辛苦，不過拍得好投入。」

她又提到如今晚上重播《皆大歡喜》，笑言自己當年廣東話不太靈光：「嗰時背對白都背到暈。尋日我哋又有一半嘅《皆大歡喜》演員上遊戲節目，大家都好期待拍下集。」