佘詩曼內地遇狂迷：佢心口紋咗我個樣

藝人佘詩曼（阿佘）出席主演電影《使徒行者》首映禮，不少無綫藝員包括胡定欣、陳智燊、張彥博及江美儀等特意前來捧場，氣氛相當熱鬧。

近日忙於遊飛機河，到各地宣傳《使》片的阿佘，於內地遇上超熱情粉絲：「佢裸露咗上半身，佢心口位置露出咗我個様嘅紋身，不過好快就畀人帶離場，佢仲將照片放上微博，可能佢好鍾意釘姐（佘戲內角色）啩。（以前有冇遇過類似粉絲？）都係熱情啲，唔會傷害我嘅。」談到無綫有意開拍電視劇《使徒行者》續集，阿佘坦言倘若原班陣容開參演的話，自己有興趣回巢效力。