老公介意？杏兒避談舊愛黃宗澤緋聞

藝人胡杏兒現身尖沙咀出席卡通電影《櫻桃小丸子：來自意大利的少年》首映禮，戴住閃爆戒指的杏兒受訪時，透露有份為新片配音：「係一位新角色，要扮小朋友聲覺得有難度，因為角色比較斯文、女仔啲。」杏兒笑言其配音表現獲專業配音員認同：「首次做配音，幾好玩呀，卡通聲有啲難扮，1日錄完晒啲對白。（挑戰聲演小丸子？）角色太經典喇，今次做佢位朋友，都OK嘅。」問到舊愛黃宗澤與契家姐傳緋聞，杏兒表示：「有記者問，冇留意新聞，唔回應啦，以後都唔好問我，祝福佢。（因為老公介意？）唔關事，都陳年往事，大家唔好問我啦。（拍拖嗰陣見過嗰位契家姐？）咁耐歷史就唔提喇。」

叫定欣快啲搵另一半

問到好姊妹胡定欣的感情，杏兒即拉開話題：「幾好呀，佢套劇好收得。（有冇同佢講感情事？）大家係成年人，唔啱分手都好正常，大家做番朋友，希望定欣快啲搵到另一半。（搵你哭訴？）冇。（夾埋去英國療情傷？）唔係，咁啱啫，我去英國探奶奶，佢哋又咁啱喺英國。（介紹男仔畀定欣？）等佢調整吓先，身邊有單身嘅男女性朋友都會撮合吓嘅。」