莊思明爆家姐有花收　楊明腳傷仲未好

藝人莊思明今日出席觀塘APM商場活動，以短褲上陣兼大騷長腿，相當養眼！講到巴西里約奧運正舉行得如火如荼，熱愛運動嘅莊思明指有抽時間觀看比賽，仲話特別留意排球及跳水等項目。

家姐莊思敏有追求者？

而提到家姐莊思敏投訴佢同男友楊明成日放閃，莊思明即時笑到甜絲絲，仲自爆家姐收花：「嗰日一返到屋企就見到紮花，問佢係邊個送又唔肯講，仲同我講『乜紮花唔係你㗎咩？』。〈佢有追求者？〉咁又唔知啦！」

楊明提早復工

此外，前日係七夕情人節，莊思明透露有同男友食飯慶祝，仲指早前拍劇隻腳受傷嘅楊明已經復工：「其實佢張假紙係開到9月，但冇理由休息咁耐。〈佢依家情況點？〉行路ok，但跑步呢啲劇烈運動會有啲痛。」莊思明又表示有時間會接送男友返工，Sweet到爆！