古天樂、張家輝、吳鎮宇與佘詩曼主演電影《使徒行者》，昨於中港兩地同步上映，票房成績相當不俗，香港全日錄得HK$1,104,260，內地票房全日則總計已超過人民幣六千萬！眾演員聽到此消息後均表示欣喜，張家輝說：「可以拍到一部戲係觀眾都鍾意，就已經心滿意足。今次又去巴西又同古仔超友誼關係咁款，都拍得有血有汗㗎！當然希望觀眾繼續支持，入場睇多幾次啦！」

古天樂說：「聽到個票房成績唔錯，都開心，希望票房愈來愈好，然後可以搵機會同成班工作人員台前幕後慶祝一下。」鎮宇說：「一直忙緊自己部新戲，已經盡量抽時間去做呢套戲嘅宣傳，聽到有好成績當然開心。好耐冇拎槍拍戲，今次拍番都覺得好爽。」

而拍完電視版再拍電影版的「釘姐」阿佘則表示：「可以延續釘姐呢個角色去到電影版，我自己都好開心，好開心觀眾會繼續買飛入場支持。我相信入得場嘅觀眾都唔會失望，期待電影快啲有慶功啦！同埋多謝觀眾鍾意Q SIR同釘姐。」

而同樣參與了電視與電影版的「歡喜哥」許紹雄得知票房成績，都表示開心：「呢幾日我同阿佘不斷喺大陸做宣傳，全部觀眾睇完都好熱情。每個地方嘅觀眾都好鍾意，我見到咁嘅反應都好開心。」

阿佘笑言：「作為演員，再用心也需要有發揮角色才能展現畀觀眾睇，所以好感激Jazz（監製文偉鴻）當初畀釘姐我去演，最感動是從這十天宣傳活動，走勻香港內地多個城市，見到每一處觀眾支持，好似他們都陪住釘姐成長，見證住一關又一關，心裏面衷心感激他們，拍攝時再辛苦也是值得，近年有這呢個角色都幾無憾。」