著名填詞人向雪懷一連兩場《香港夏日流行音樂節．向雪懷一生中最愛作品演唱會》於紅館開鑼，邀得廿三個單位任嘉賓，包括：周慧敏、關淑怡、黎瑞恩、湯寶如、王馨平、林志美、草蜢、鍾鎮濤（阿B）、譚詠麟（阿倫）、歌手胡琳及無綫主播吳幸美等，身為主角向雪懷一直坐在台下欣賞，直至周慧敏及阿倫出場，向雪懷才上台與嘉賓「吹水」，全晚亮點落在穿上超低胸露出四寸深「事業線」的關淑怡身上，雖然外披長褸，但迫爆上圍成功搶Fo，而胡琳及吳幸美亦谷胸上陣，寶刀未老的黎瑞恩與十二名舞蹈員邊唱邊跳，令全場拍爛手掌，壓軸出場的阿倫則掀起全晚高潮。

王馨平感冒聲沙沙

抱病的王馨平透露因感冒搞到聲沙，她說：「唱得唔好請大家原諒。」全場即報以掌聲，抵死的王馨平說：「你哋真係有善心。」湯寶如直言向雪懷是恩師，她說：「佢帶我入行。」黎瑞恩透露做歌手七年，推出了七張轉專輯，當中五張都是由向雪懷監製。草蜢表示向雪懷為樂壇創作好多好作品，亦是草蜢第一張專輯監製。自言非常緊張兼不懂說話的關淑怡說：「冇向雪懷就冇關淑怡，我今年出道26年，大家都識嘅歌都係向雪懷寫，好似返番屋企咁。」

阿B大玩粗口諧音

周慧敏與向雪懷在台上分享入行經過，向雪懷說：「當時係我同佢試音，佢自彈自唱中文歌。」周慧敏說：「當年都已經傾合約，點知臨門媽咪唔想我做歌手，我就繼續去讀書，六年後返番寶麗金懷抱，學習等待。」鬼馬的阿B自爆向雪懷曾經在錄音室當「工作人員」，他說：「我同佢嘅歷史係由『辣雞』開始，當時佢幫寶麗金歌手錄歌，有次錄音機壞咗，佢攞住『辣雞』手震震。」隨即疑似講粗口說：「黐嗰啲膠線，佢才華唔只黐嗰啲線，不過佢最後發現最叻係文筆，寫咗好多靚歌畀大家。」阿倫主動拉向雪懷上台，他踢爆對方創作的歌曲《午夜麗人》是寫給職業女性，他說：「好到肉，我問佢係咪成日去（指夜總會），當時佢話冇，佢依家梗係冇，因為佢太太好似坐佢側邊。」隨即大讚對方的創作對香港樂壇很有貢獻。

向雪懷受訪時直言好開心，他說：「咁多人每人真係只唱到兩、三首歌，好感觸，好似Family咁，係寶麗金精神。」問到李克勤及黎明缺席會否感美中不足？向雪懷說：「克勤因為同容祖兒係佛山開騷，佢話下次搞邊到都去，黎明就當我印海報時就話唔得，佢好紅，有好多工作，做呢行身不由己，今日已經好開心同好滿足。（開兩場夠喉？）我唔係賺錢。」