《韓劇榜》：河錫鎮尹昭熙玩「戲假情真」

今集《韓劇榜》有好多精彩內容介紹畀大家，韓劇成日都玩唔少新花款，今次佢哋又有新搞作，推出咗一套綜藝型韓劇《話劇結束之後》，由河錫鎮、尹昭熙同Girl's Day嘅Yura主演，大家睇劇嘅同時，又可以睇到劇中演員私底下係點樣互動，真係話題性十足。

而最近韓國都有唔少勁Hit嘅韓片，除咗孔侑套《屍殺列車》，仲有孫藝珍套《德惠翁主》都好受歡迎，唔少人都大讚孫藝珍演得好好，成功咁將呢個充滿痛苦嘅歷史人物演出嚟，今次仲會講埋人氣男團防彈少年團(BTS)嘅Jimin同J-Hope一齊上綜藝節目打工，咁多咁正嘅內容，大家千祈唔好錯過《韓劇榜》啦！