仙姐親臨撐場笑笑口　陳寶珠開騷未自滿

由粵劇名伶陳寶珠、梅雪詩（阿嗲）主演的經典粵劇《牡丹亭驚夢》在尖沙咀文化中心再度公演，將一連演出六場，首場已順利完成，兩人師父白雪仙坐正中間靚位睇足全場！尾聲時寶珠率領一眾演員謝幕，大批觀眾湧上台前拍照，氣氛熱烈！全場Fans更向仙姐說：「多謝仙姐！」而仙姐隨後在護送下離開，未有接受訪問。完騷後，數十Fans仍然不捨得走，更有寶珠Fans舉燈牌狂叫「寶珠Good Show」，更在劇院外守候！

寶珠姐養聲唔想感冒

寶珠及阿嗲在後台接受傳媒訪問，問到是否滿意演出？寶珠說：「永遠唔會滿意。」阿嗲說：「希望聽日再好啲！（好多Fans支持喎！）多謝大家，留到咁夜，咁辛苦。」講到他們在五月時公演了20場，今次再重演，問到體能上如何，寶珠說：「休息咗一段時間，ok！（上次表演期間你病咗！）係呀！所以依家要保護把聲，希望唔好感冒。」

阿嗲達唔到仙姐要求？

兩人又期待仙姐會給予意見，阿嗲笑說：「見佢今晚冇出聲，我諗我梗係做得好曳。（唔係呀，仙姐有笑！）有笑就好喇！佢一向比較嚴格。」問到對住師父演出是否格外緊張，寶珠笑言台下太黑，未看清楚師父坐在哪處：「要專注自己演戲嘛！（打電話問番佢意見？）要親自上去架！平時會有紙仔畀我哋。」問到曾給予甚麼意見？阿嗲說：「之前都有話我哋，一路有叫我加倍努力，我做極都唔到師父要求，盡力再努力！」

經經撐寶珠姐場

對於兒子楊天經前來捧場，寶珠笑言對方經常都來帶給她正能量，講到天經的舞台劇隨後在同一劇院演出，寶珠笑說：「我場場都會睇，我要做星媽。（畀意見囝囝？）冇呀！佢演過幾次，經驗仲豐富過我！」訪問後天經與太太送上愛心熱水，並代古天樂向兩人送贈多張《使徒行者》戲票，阿嗲笑言要多謝「古先生」，天經笑說：「你咁叫佢唔知識唔識應喎！」阿嗲再搞笑說：「咁應該係樂哥哥？樂Dee Dee？多謝你！」