張繼聰地獄式操肌　謝安琪勁心痛真佩服

「肌男」張繼聰為了以最佳狀態拍攝健身補充品廣告，進行地獄式健身更透露操足9個月，老婆謝安琪接受《東網》電話訪問時表示感到心痛，指阿聰每日拍戲拍至筋疲力盡，但回家後仍會堅持繼續健身，令她真心佩服老公的毅力。

冇油冇糖冇鹽自己焗nuts

她說：「我好少佩服人，但見佢返到屋企仲喺房玩健身球，未天光、喺開工前又出去跑步，而且食嘢係開心事，但佢係食啲冇味嘅嘢，我都幫唔到佢啲乜，只可以幫佢隨時準備好佢需要嘅食物，好似買啲nuts返嚟，再冇油冇糖冇鹽自己焗。其實佢係生果都唔食得，因為生果有果糖，所以我會準備足夠嘅健康飲品喺雪櫃，等佢想飲時，就立即有凍嘢飲，咁佢會舒服啲。」