囡囡紮紮跳冇時停　張家輝孖老婆掃平衫

影帝張家輝日前與太太關詠荷及女兒張童（Brittany）一家三口出巡逛中環。當日下午家輝行完名店就轉攻平民時裝店，雖然身家豐厚，但家輝都好識慳家，埋首揀199蚊的平價衫。現場所見戴上Cap帽的家輝右邊顴骨位貼上膠布，似是受傷，當他揀完衫排隊準備付錢時，女兒和太太現身會合，現年10歲的Brittany長高不少；現場所見，她雙手搭住爸爸膊頭，兩父女感情甚佳地有傾有講，而活潑的Brittany更不時紮紮跳，而她和爸爸玩完後，再轉去找媽咪揀衫。

掃完貨後，一家之主的家輝主動做阿四，一手拎起全部戰利品，Man到爆地帶住妻女往商場外取車。期間張童發現記者，立即自動波用外套的帽笠住自己，同時又黐實關詠荷搞笑地頻頻偷望兼偷笑；至於家輝則友善地揮手打招呼，然後便登車載着妻女齊齊打道回府。