莊思明恨同楊明拍劇：但唔要做情侶

藝人莊思明出席名車活動，她表示與男友楊明均喜歡駕車，問到是否愛開快車？她說：「我都鍾意，但要練好啲技術先，佢（楊明）就唔會揸好快，佢好安全。（兩個人平時有冇遊車河？）冇時間。（有冇諗過自駕遊？）都想，可以去多啲地方，但未試過，我哋連一齊去旅行都未試過，等佢忙完先。（男友之前傷腳，依家好番未？）好得七七八八，但做完劇烈運動會有少少隱隱作痛，我會建議佢做針炙。」

談到工作，思明透露剛拍完電影返港，但又將到馬來西亞個多月拍攝另一部電影：「今次套戲我要做打女。（男友會唔會擔心你受傷？）唔會，依家開始搵師傅練吓，其實十年前我拍第一部電影都係做打女，由頭打到尾，當時為嗰部戲我有學過詠春。（有冇興趣做《G-1格鬥會》？）畀錢我咪ok，我會保護塊臉同個頭，其他地方隨便打。（有冇興趣同男友情侶檔拍劇？）我同佢都想，大家未試過，但我哋唔想做情侶，因為冇新鮮感同挑戰性，我想各自有感情線，但放喺同一場。（會唔會睇到眼火爆？）我諗我唔會。（你拍戲要有親熱鏡頭會唔會問過男友？）我會同佢講，但冇得唔ok，佢要拍親熱戲都會同我講，我都冇得唔ok。」