陳法拉返美繼續學業：拜拜香港

藝人陳法拉2010年爆出同Neway太子爺薛世恒喺美國秘密结婚後，事隔3年便傳出離異消息，之後法拉就去美國紐約修讀為期四年嘅戲劇碩士課程，自我增值。今個暑假法拉回港，與棟篤笑始祖黃子華公演35場舞台劇《前度》，法拉演技大躍進，獲圈中好友撐場。

話咁快法拉又要執埋包袱返美國繼續餘下嘅課程，今日凌晨喺網上甫咗一張自拍相，同香港粉絲說再見，留言：「Thanks Hong Kong for a great summer!拜拜香港～多謝大家給了我一個難忘的暑假！」唔少網友都好唔捨得，叫佢加油，完成個課程。