太多歌唔識揀　許冠傑預告唱足四個鐘

歌神許冠傑（Sam）為十月紅館演唱會舉行記招，事後跟兩子許懷欣、許懷谷演唱會監製蕭潮順受訪，Sam透露演唱會開四面台，現時開始操練：「仲有兩個月。（會加場？）未知，睇反應。」講到他今次演唱會搞新意思，以「選舉」為主題，呼籲歌迷及藝人投票選出心水「Sam歌」，他表示暫時最多人投是《浪子心聲》、《心裡日記》，到時會唱出。問到他有這樣多歌曲，選歌時可會頭痛？他笑言：「係，好多歌，會盡量唱，唱三、四個鐘。（超過之前開騷嘅時間？）我次次做騷都唱好長，今次唔知幾長，可能都三個幾鐘。」而有此「選舉」主題，蕭潮順表示：「今年有選舉氣氛，所以就最民主，畀大家選歌，而28號Sam都會落街拉票。」

捉台下歌手上台

講到嘉賓陣容，Sam表示暫時有糖妹、陳凱彤、何傲兒及家人等，但新抱Ida就因有喜而不會來，講到又抱孫，他表示：「好開心！又多個孫，係男仔。」問到到時可會叫懷欣兩個仔上台？他謂：「暫時未肯定，可能兩個孫會上。」懷欣就補充：「佢哋鍾意唱歌。」Sam亦謂孫仔學緊他的歌，又有聽他的歌，其中愛聽《財神到》，懷欣亦謂：「因為重覆字簡單唱啲。」講到譚詠麟、黎明等人拍片支持他，到時可會叫他們上台唱歌？他謂：「唔知，睇吓到時台下有咩歌手出現，可能會捉佢哋上台唱歌。」講到他緊貼潮流，拍片召喚「明福俠」黎明幫他整個豹紋「Sam福俠」，對此他笑言：「貪得意玩嘛。」

生日食牛扒慶祝

Sam亦謂現時正操fit身體，講到找狄易達為演唱會編排舞蹈，他表示到時要跳舞：「有幾場英文歌歌舞，會跳埋一份。」又表示會唱貓王的歌：「今次會唱幾首好勁嘅60年代英文歌，又歌又舞，好勁。」講到他將於9月6日生日，他表示會食最愛的牛扒慶祝：「每年都會食一次，出去食。」不過就未知孫仔會送甚麼禮物。