阿Sa潘瑋柏晒情侶口罩　楊丞琳加入戰團

藝人蔡卓妍（阿Sa）舊年9月同陳偉霆分手後，感情一直未有着落，粉絲都戥佢搵另一半心急。尋日下晝，阿Sa喺微博突然晒出一張戴住黑色口罩嘅自拍照表示搭飛機，而隔咗冇幾耐之後，台灣歌手潘瑋柏又晒出一張同樣戴住黑色口罩嘅自拍照，個口罩仲要同款添！潘瑋柏仲@咗阿Sa，不過就冇講任何嘢，神神秘秘咁…咦！呢種默契似唔似藝人要公開戀情嘅前奏？唔少中港台網友見到後都嚇咗一跳，話諗極都唔明點解阿Sa同潘瑋柏扯上關係，佢哋仲要冇合作過，又點會一齊以「情侶」姿態搭飛機？

到咗夜晚，潘瑋柏又再出招，不過今次@嘅係阿嬌（鍾欣潼）…今次Twins真係都畀佢玩晒啦！而喺呢個謎團仲未解開嘅時候，台灣女星楊丞琳卻突然主動加入戰團，喺微博晒出一張又係戴住同款黑色口罩嘅相，仲要@埋潘瑋柏，令成件事變得更複雜…

可能見到一時玩大咗，阿Sa就急急腳於微博解畫，佢轉發潘瑋柏條博文，並留言：「同款連接～」哦…原來咁啱口罩同款，貪得意post吓啫！今次真係畀你哋嚇到心肝仔都跳埋出嚟呀。

而潘瑋柏今日亦喺微博表示此行係飛去北京出席新店開幕禮，而同行嘅人仲有好友唐志中同劉畊宏，咁即係唔係同阿Sa出埠拍拖拖？睇嚟大家可以放心喇！