【泰國慶生斷正】蕭亞軒疑撻高球小鮮肉

台灣天后蕭亞軒有新戀情喇！蕭亞軒（Elva）舊年同有米男友兼吳建豪舅仔Elroy情變後，今年三月有傳同老外Michael有過短暫曖昧，不過都係只聞樓梯響，二人終未有開花結果。不過尋晚，Elva就去咗泰國曼谷慶祝37歲生日，身邊多咗個高大猛男，二人更十指緊扣等過馬路！可能Elva諗住離開台灣就可以玩得輕鬆，仲搵埋一班朋友齊齊happy兼轉移視線，不過都係畀眼利網友撞到正，鬼咩，兩個人拖晒手仔出街，好難會見佢哋唔到。

網友圖文並茂表示「蕭亞軒和他（她）的男友在曼谷」，仲拍埋片去證明佢冇認錯人，不過無論相同片都睇唔到Elva正面，但該位網友就好肯定話係Elva，又話Elva明知佢偷拍都好淡定咁堅持唔回頭畀人影到佢正面。

有媒體就人肉搜尋高大猛男，指佢叫Michael Chen，雖然同前緋聞男友撞名，不過今次呢個Michael係美籍台裔身分，亦係高爾夫球好手兼小鮮肉，今年先大四，喺美國曾經拎過高爾夫球個人獎，又為加州長灘分校贏埋第二名。其實Michael一早已經喺Elva Instagram「現身」，仲Elva拍低佢打Golf嘅雄姿㖭！而Michael就將自己個Ig轉為private，唔知係咪怕二人戀情曝光呢？