瞓覺重要過談情　黃翠如同蕭正楠冇偈傾

藝人黃翠如、岑麗香、黃心穎、楊秀惠及馬國明等到馬鞍山宣傳劇集《為食神探》，幾位女神玩有口難言遊戲時含住「奶嘴糖」，畫面爆趣！翠如前日與男友蕭正楠（Edwin）、陳豪及郭晉安等到北京宣傳，她透露撞正航班延誤而在機場滯留：「真正逗留喺北京得兩個鐘，但飛機Delay咗四、五個鐘，結果尋日先返到嚟。（可以同Edwin相處耐啲囉！）全程幾乎冇乜傾偈，Edwin等嘅時候狂瞓，到我上機就瞓，大家都太攰，係喺機場食咗一餐飯，不過呢次幾得意，始終未試過即日來回北京。」

同「雙豪」有感情線

講到有份拍攝新劇《使徒行者2》，翠如表示約在十月底開工，外景拍攝地點未定，問到有否感情線，她說：「會同周柏豪、袁偉豪，但詳情未firm。（動作戲？）未知呀！都係好初步，不過我好鍾意宣萱，佢依家拍緊另一套劇，大家都讚佢好nice，我又一直有睇佢啲劇，所以好期待同佢合作。」