【被消失的結局】王君馨爆溫馨鏡頭被刪

20160829
東網電視
更多新聞短片
又話不見不散嘅。(哭)
劇集《城寨英雄》終於大團圓結局,「刁蘭」胡定欣同「拳佬」陳展鵬一招法式濕吻,成功打敗「終極Boss」砵仔糕老闆「楊竹鑾」(歐瑞偉飾),都真係幾surprise,仲有網民想「花曼」王君馨同「龍成虎」伍允龍翻生,話佢哋之前犧牲得好唔抵!
之前花曼一死令王君馨人氣爆燈,連陸永嘅囡囡都因為佢「慘死」而喊到啜泣,總之就全城陷入洋蔥狀態。早前王君馨就爆料指「花曼」會喺最後一集入面再度登場,佢仲喺尋日結局出街之前就寫晒文上社交網,話約定大家喺佢同「牙佬」袁偉豪定情嘅九記麵檔見,仲講到不見不散咁話。
尋日睇完成個結局,大Boss死咗,刁蘭同拳佬雙宿雙棲,咁花曼呢?睇完都仲未見人嘅?播完大結局之後,王君馨終於自己開估,原來本身佢同牙佬仲有一段溫馨談情戲被刪,佢自己本身都好期待㗎,仲話係佢自己好鍾意嘅一場戲㖭,可惜……最後都係冇播出街,都咪話唔sad!王君馨寫道:「一場我很喜歡的戲,但最終卻沒有在螢幕出現。即使他們相隔很遠,但他們的心永遠在一起!」