【一街都會係刁蘭？】胡定欣睇結局爆喊

無綫劇集《城寨英雄》昨晚播出大結局，獲得平均32.9，最高35.2的超高收視，台前幕後聞訊自然興奮不已。身為女主角的胡定欣接受《東網》電話訪問自爆昨晚相約拍檔們睇大結局時，自己變成喊包：「我知道有咁好收視，喺街都大叫咗出嚟，真係好開心同感動。多謝觀眾支持，證明大家付出冇白費囉。睇番自己整蠱陳展鵬嗰場戲，我真係喊得好勁，心情亦太過複雜嘞，所以喊到停唔到。晚飯嗰陣，監製文偉鴻坐喺我隔籬，我好戥佢開心，我自己都好鍾意刁蘭一角。」

刁蘭造型超受歡迎

由於拍檔陳展鵬身在加拿大登台，定欣希望等對方返港再一次慶祝。談到二人的劇集合唱插曲很受歡迎，定欣謂：「知道呀，不過未諗過再做歌手，暫時都會以拍劇為主。聽講好多粉絲依家話想整刁蘭嘅曲髮同埋紅唇造型，好開心。（對稍後再同展鵬合作拍新劇，信心更大？）係。（對年尾爭視后更有信心？）想攞『最佳劇集』多啲，因為個奬屬於所有人嘛。尋晚返到屋企真係瞓唔着，內心忽然好空虛，又翻睇多一次結局。」