王君馨預告fb Live教大家化「花曼」妝

無綫劇集《城寨英雄》昨晚播出大結局，獲得平均32.9、最高35.2的超高收視，台前幕後聞訊自然興奮不已。「花曼」王君馨亦大表興奮：「嘩！（收視）好誇張，真係超高。尋晚喺食飯現場，歐瑞偉死嗰場戲，大家都有喊，當時已喺度諗﹕『聽晚9點半點呢？』過去嗰28日大家都追（睇）得好犀利，我入行9年都未試過有個角色咁深入民心。」

自創花曼造型

君馨又指不少網民粉絲都會剪輯一些花曼的造型及片段，轉發給她留為紀念：「依家開緊劇，等拍完就會專心睇番大家畀我嘅嘢。我都想做一次Facebook Live，教大家點樣整花曼造型，其實開劇之前，我都花咗兩、三個禮拜研究呢個造型，成個妝都係自己化，化妝間同事幫我執吓咁，依家就有粉絲成日追問我個妝用咩型號唇膏！」

自覺未夠班拎「最佳女配角」

問到有否信心奪得「最佳女配角」？君馨表示：「個個都話等住睇我攞獎，真係好開心同感動，但自問未夠資格，今次好多人幫我，有獎係大家畀我嘅，而我嘅演技仲有好大進步空間。」