孫慧雪「騷胳肋底」扮喪屍

好多人睇完戲之後，都會忍唔住扮下戲中角色，滿足吓自己。呢日宅男女神孫慧雪（雪雪），睇完喪屍片之後，就喺社交網站上載咗段扮喪屍嘅短片！

片段中雪雪反晒白眼扮喪屍行路，手手腳腳都扭曲晒，佢仲舉高自己隻手，係咁騷胳肋底，但點解要咁做呢？去到最後仲扮發狂想咬人，但係雪雪版嘅喪屍一啲都唔得人驚，仲幾可愛添！如果雪雪真係變咗喪屍，相信大把男士會排隊俾佢咬呀！

講返呢套韓國男星孔侑主演嘅喪屍災難片，星期四喺香港開畫之後，票房已經超越咗全智賢主演嘅經典韓片《我的野蠻女友》保持咗14年嘅紀錄，成為香港史上最賣座韓片，認真犀利！