阮兆祥老是常出現　網民Never Mind

依家啲藝人認真搏到盡，好似無綫劇集《城寨英雄》啱啱先播完，劇中男主角陳展鵬又接住演出《巨輪II》，一劇接一劇忙到暈！

其實講番再早少少，已經有資深藝人羅樂林喺同一日播出嘅電視劇中死足五次，創下「一日死五次」嘅電視傳奇！最近又有眼利嘅網友發現，原來阮兆祥一日出現三次，分別喺尋晚首播嘅《巨輪II》及《為食神探》，仲有凌晨時段重播嘅《皆大歡喜》都有現身呀！

八點半播出嘅《巨輪II》，當中阮兆祥飾演「龍飛」，同視后兼人妻田蕊妮拉埋天窗，仲有唔少親熱戲份添，認真幸福！不過，據知之後劇情講到佢因意外失憶，連摯愛都唔記得，勁「慘慘豬」！而接住播出嘅《為食神探》，阮兆祥展現搞笑本色，飾演「麥犀」麻甩又毒舌，仲成日搞爛GAG，唔少網友都話笑到標晒眼水添！

正當觀眾睇完阮兆祥化身「慘情王」及「爛GAG王」，老是常出現嘅佢再度登場，凌晨時段重播嘅古裝喜劇《皆大歡喜》飾演「游念富」，角色懶散又得把口，夠晒討厭！雖然阮兆祥一日出現三次，但佢喺三套劇分別飾演唔同角色，觀眾自然唔會混淆又有新鮮感。另外，一班網友都好受落，仲大讚阮兆祥夠晒搞笑，一晚睇三次都唔嫌悶！

網民有話兒：

XX飄零：好彩阮兆祥唔洗（使）死，如果唔係要一日死三次，好似羅樂林咁。

CheungXXX：冇問題啦，我鍾意睇佢啲戲。

LhkXXXKY：有得一日見三次好開心。

李麒X：好演員，給一萬個讚都不夠！