一拖三赴台度假　香香呼籲唔好打擾強強

宅男女神岑麗香去年三月與居於加拿大的六呎猛男「強強」蜜運，兩人愛得火熱，雖然分隔異地，但兩小口一有時間就會「合體」見面周圍去，數月前先同「強強」在溫哥華探望完好友鍾嘉欣，日前又再孖男友去台灣遊玩，更被人見到在酒店泳池，玩到非常甜蜜，不時火熱貼身抱抱，羨煞旁人！

與女仔朋友同房

問香香今次旅行係咪同男友一間房？香香則澄清：「唔係，今次台灣旅行喺加埋我，四個朋友一齊去，我同另一個女仔朋友同一間房，去游夜水嗰日，我哋都唔係游完即刻返房，而係出咗去食嘢。」

拍拖唔係錯事啫

對於去到台灣都畀人見到，香香表示做藝人「有辣有唔辣」，咁遠都畀人認到都係好事，但當然缺少私人空間就有啲無奈，希望下次有人見到佢又認得佢嘅話，就同佢打聲招呼。問下次同強強拍拖會否避忌啲，唔好咁親蜜惹人注目？香香即嬌嗔地說：「唔拍拖喇！」之後就認真地說：「其實都係做番正常人會做嘅嘢，又唔係乜嘢錯事，所以都唔會匿埋，平時工作都好辛苦，放假想Relex啲，強強唔係圈中人，希望唔好太關注佢，太打擾到佢啦！」