藝人洪永城與馬國明（馬明）以「情敵檔」一同出席腕錶品牌活動，馬明表示拍動作片就適合戴防撞錶，而洪永城就笑言要有防彈功能，因為成日要去戰火地區，但二人在台上零交流，似乎「情敵」味甚重。

馬明喜歡「情敵檔」

馬國明表示首次以情敵檔出活動，希望以此組合出席更多活動，洪永城笑言：「呢個係噱頭，可以殺出一條血路。」二人更異口同聲說：「人哋鏡頭前好好，鏡頭後就面左左，我哋就調轉，鏡頭前面左左，鏡頭後就好好。」提到二人台上零交流？洪永城就解釋在台上忙於騷錶，並不是騷關係。馬明直言喜歡「情敵檔」，希望可以一齊唱歌登台。而洪永城就反問：「使唔使分番啲畀中間女主角（唐詩詠）？」馬明就叫洪永城分自己嗰份給唐詩詠，自己只會請食飯。問到是次酬勞？馬明即笑言洪永城好貴，洪永城表示：「低你少少，唔講幾多，有五位數啦。」

唐詩詠是煙幕？

而二人都知道雙方會出席活動，洪永城更笑言做新聞玩鬆踭，馬明就話：「接多幾個job，畀你鬆一踭無所謂。」雖然二人暫時未有機會合作拍劇，但二人全程互笠高帽，馬明表示洪永城現在叫洪哥，洪永城即說：「唔係，係洪仔。（你哋咁客氣嘅，係咪唔妥？）你哋估吓。」洪永城即與馬明又背對背，又作狀攬馬明，馬明表示：「唔可以穿煲，太白會冇得估，等人估係咪不和同爭女。」記者笑言會否唐詩詠是煙幕？洪永城笑言又多個市場。

詩詠直言要畀番啲錢佢

而女友唐詩詠亦知道二人同場出席活動，洪永城說：「佢知，問幾錢，佢話要畀番啲佢，幾直接呀。」馬明坦言下次可以搵三人一齊出活動，洪永城即說：「幾錢先，我冇問題，但詩詠好貴，可能我哋兩個夾埋先係佢嗰份，佢得我哋都得。」馬明表示：「唔好睇少我呢個妹，佢多廣告多活動。」