楊明惹婚訊疑雲　莊思明絕不奉子成婚

藝人莊思明與楊明拍拖半年，二人經常放閃，今早楊明突然在社交網發文：「你是我人生裏面最後一個女人，交給我吧！」惹來求婚成功喜訊。思明出席慧妍雅集活動時就否認婚訊，但就冧爆甜笑說：「今朝起身好多人打嚟恭喜我，都唔知發生乜事？」

只欠一隻求婚戒指

當被追問是否已經求婚成功？她說：「如果係求婚就只差隻戒指。（有戒指就應承？）睇佢到時求婚驚唔驚喜先啦！（會唔會閃婚？）唔會，都有計劃，如果真係結婚，身邊人實知，你哋都一定知啦！」

「成日都氹我開心」

談到女星舒淇宣布與馮德倫結婚？她表示不知情，但送上祝福。問何以男友突然在網上發表愛的宣言？她笑說：「佢都係想做啲嘢氹我開心，我都冇諗過佢會寫呢啲，佢成日都氹我開心，多謝佢！」

拖楊明與家人慶中秋

記者再三求證是否楊明要求婚？思明說：「等佢做多啲嘢先啦！例如演技上再有突破，（咁即係你都願意？）咁我又唔細，佢又唔細啦！都視對方為結婚對象。（屋企人好鍾意佢？）係呀！特別係媽咪，成日託我問候佢，對佢態度仲好過對我。」思明又透露今個中秋是兩人首個中秋佳節，屆時將與男友及家姐莊思敏、莊思華一起歡度。

此外，談到不少人都奉子成婚？她表示不會發生，除非有意外，笑指二人很小心。