「阿妹」楊怡出嫁 馬浚偉送定金豬牌
20160907
東網電視
更多新聞短片
馬浚偉同楊怡以兄妹相稱，阿妹結婚咁重要，呢位阿哥一早送定禮物呀！
「準人妻」楊怡即將喺10月2日同羅仲謙註冊結婚兼擺酒，正式榮升做羅太！雖然距離大日子仲有未到一個月，但係曾經同楊怡合作拍電視劇《守業者》嘅馬浚偉就已經一早送咗份大禮畀楊怡！
話說7月頭時，楊怡就同謙謙去咗睇黃子華同陳法拉嘅舞台劇，佢哋仲喺後台同馬浚偉一齊影相，嗰時楊怡已經收到呢份禮物，不過就未有透露係咩嚟，只係話好貴重，非常神秘！
不可衡量兄妹情
而今日，馬浚偉竟然突然揭曉！！！原來係「豬，全部都係豬」呀……以兄妹相稱嘅兩人感情深厚，馬浚偉好大手筆買定個金豬牌送畀阿妹，仲叫佢到時一定要戴！睇嚟呢個阿哥都好想楊怡快啲生B呀！不過馬浚偉真係唔話得，錫到個阿妹燶，仲話唔可以用現實價值去衡量佢哋嘅感情！
要求合照
馬浚偉留言：「楊咩（楊怡），收到妳的囍帖和禮餅，做得你哥哥一定到賀！當然，妹妹結婚，做啊哥又怎能不出手！這金豬牌可愛吧？真的大個拳頭架，記得戴住影相啊哈哈！祝妳和him（謙）仔永遠幸福快樂，一心一意一輩子」
謙謙你真係要好好愛錫呢個老婆呀，唔係呢個大舅一定唔會放過你呀！
三大三細合共重五両
馬浚偉接受《東網》訪問，話送禮在心意，價錢唔重要，記者幾經追問，馬浚偉先肯講，話三大、六小一共六隻金豬，夾夾埋埋約五両重，價值約六萬蚊港喎。