唔搵Moon陪行紅地氈　伍允龍澄清冇撻着

藝人伍允龍接受電台訪問時，透露首部拍攝的荷李活電影《龍之誕生》入圍國際電影節，即將會飛到多倫多。提到會同邊個行紅地氈，他表示未知道，問到為何不叫緋聞女友劉佩玥行紅地氈，他說：「冇呀冇問。（怕被拒絕呀？）唔驚，但唔會問。（之後單獨出活動會唔習慣？）咁不嬲自己出嚟先，係觀眾好鍾意我哋角色，所以當咗係真。（唔係真？）唔係真，大家做訪問可以處理得好好。」

普通朋友聚會

講到帶Moon出席朋友聚會，伍允龍坦言是普通朋友聚會，只是Jessica C.甫了相在Instagram：「佢哋都鍾意柯德莉個角色，Moon又覺得Andy個BB好得意所以先一齊食個lunch。」

唔會順道探鍾嘉欣

至於問到可會到溫哥華探鍾嘉欣，他指因為多倫多同溫哥華都相隔一段距離，而自己亦會到芝加哥同家人過生日，所以不能去探望對方。另外，問到若日後可會接受同Moon拍愛情劇，伍允龍說：「如果監製方面安排，都會盡力做。（細細粒都ok？）邊個都會盡力做。」