鄭嘉穎推電視劇演音樂劇：純睇錢未必會做

藝人鄭嘉穎（嘉穎）及謝天華（天華）出席《風雲5D音樂劇》的記者會，期間公布嘉穎飾演步驚雲，天華飾演聶風，事後兩位主角受訪，表示是幾個月前得悉演出消息，問到跟之前的作品比較可會有壓力？天華表示：「（壓力）唔係嚟自呢度，始終今次係舞台劇形式，唔係電視劇或電影，係另一種演繹方法，壓力反而係嚟自特別效果，所以綵排時間要耐啲，同埋要應付好多武打、舞蹈同唱歌。」嘉穎亦謂：「佢做過舞台劇，今次係我第一次做舞台劇或音樂劇，好大挑戰，希望到時綵排可以盡量多啲時間。」他們亦謂有很多打鬥場面，問嘉穎會不會怕弄傷舊患？他謂：「都冇計，有咁大嘅挑戰點都去做，唔使諗。」

明年四月開騷

問到現時開始練體能未？他們則謂未咁快正式綵排，因為明年四月才開騷，所以還有幾個月時間練體能。講到今次演出需要長時間綵排，問到豈不是接少了其他Job賺少了錢？天華想了一會兒後答：「有啲嘢某程度上係要犧牲，舞台劇始終同其他表演係唔同，唔成正比，用好多時間綵排，但公演可能只得幾場，所以要好熱愛舞台劇，唔可以用錢衡量。」嘉穎亦謂：「如果純睇錢好多人未必會做（舞台劇），拍一套內地劇時間短好多，錢又多好多，但劇集幾時都有得拍，呢啲Project好少有，所以應該好好把握。（推咗幾多套劇？）好難計，因為你接咗一部另一部就唔會接到，所以點都係推一部。」天華就笑言推了很多跟朋友吃飯的時間。

祥仔嗌王壓力

而黎耀祥將會在劇中飾演泥菩薩，祥仔坦言今次大壓力：「因為唱歌跳舞都唔係我強項，所以係大挑戰。」問到可會收少啲酬勞？祥仔笑言：「梗係會啦，我哋呢啲係投番嚟做，自己畀錢出嚟都要做。」