肚臍痕囉囉攣　晒背胡琳畏高照頂硬上

身穿白色露背長裙的歌手胡琳及閻奕格出席《風雲5D音樂劇》的記者會，其中宣布胡琳飾演楚楚，閻奕格飾演孔慈，事後兩人受訪，講到她們兩位唱家班對鄭嘉穎、謝天華、譚耀文、呂良偉、黎耀祥等演技班，胡琳表示：「佢哋都係臥虎藏龍，嘉穎同天華都係唱歌。」閻奕格坦言今次大壓力：「我未做過戲，仲要飛、打、跳。（自己體能ok？）有做開運動，有打開拳，但同武打又唔同。」

搵教練操體能

胡琳則謂自己有跳開舞，但冇做劇烈運動，故都要搵私人教練幫自己操體能。講到要吊威吔演出，問到她們可有畏高？閻奕格表示：「講係冇，但上月去咗主題公園玩跳樓機，上到去嚇死我，以為自己好勇敢，但原來都係有少少驚。」而胡琳則謂自己有畏高：「喺高嘅地方望落去我會肚臍痕、囉囉攣、腳軟，但克服方法都係要去做，唔好諗咁多。」