唔夠瞓抵抗力弱！蕭正楠背脊生蛇頂硬上

無綫藝人蕭正楠（Edwin）現時正忙於拍攝無綫劇集《翻生武林》，由於此劇動作戲甚多、經常要出外景，加上Edwin要為正播映中的劇集《巨輪II》宣傳，在長期「唔夠瞓」情況下，終於捱出病，仲要係「生蛇」（帶狀疹）添，情況令人擔心。

強調自己身體強壯

蕭正楠接受《東網》獨家訪問時謂：「之前拍外景畀蟲咬，搞到皮膚炎，之後又氣管敏感，成日瞓唔到，可能抵抗力弱搞到背脊『生蛇』。我初頭仲以為之前拍滾地戲時畀沙蚤咬，但後來有啲痛，隔兩日愈生愈多，醫生話我係『生蛇』。其實自己不嬲身體強壯（小編註：吓？），可能拍呢套劇太過消耗體力啦。」

劇接劇忙不停

蕭正楠表示已吃了抗生素，傷口已結疤，現時拍攝時要就住傷口，因吊威吔時掂到會好痛。談到《翻生武林》還有三星期就拍畢，蕭正楠笑言希望頂埋佢，更謂：「之前都只停咗一晚廠就開工，惟有喺拍攝期間一有時間就笠住頂帽盡量爭取時間休息。」之後，Edwin又會開拍新劇《穿梭四百年》，與老友曹永廉及好拍檔田蕊妮合作。劇中蕭正楠飾演明朝將軍，因返現代生活搵公主而鬧出不少笑話。