羅敏莊願為陳國邦回巢無綫負全責

藝人羅敏莊（Mimi）日前接受電台訪問，大方提到當年與經理人鬧翻被雪藏五年，令她留下簽經理人陰影，Mimi說：「唔畀我唱歌都算，點解要封死所有工作，冇晒自由，之後對咩人，甚至連大台都唔敢簽經理人合約。」被禁幕前工作的Mimi轉到電台做文員，由於碰見不少熟悉面孔，Mimi說：「當我喺度做嘢嗰陣，啲歌手會透過窗見到我喺度聽電話，會覺得我喺度做乜，當時心情係好難受，始終年紀輕，覺得好冇面。」

送椰堆奶茶追陳國邦

Mimi因與陳國邦合作無綫劇《雲海玉弓緣》擦出愛火，Mimi大讚對方很專業，並自爆是主動追求陳國邦，她說：「比較欣賞工作投入又有吸引力嘅男人，唔一定要靚仔，之前啲男友都唔係靚仔。」隨即對陳國邦展開「椰堆」、「奶茶」攻勢，Mimi說：「我見佢每日都買奶茶，所以我就為佢準備，又試過買椰堆畀佢，知道佢鍾意食，所以日日買畀佢。」

「反口覆舌係我」

對於老公陳國邦去年在個人網誌寫了一封名為「給無綫電視的公開信」宣布離巢，Mimi坦言事前全不知情，她說：「之前有同佢分析外面仲有機會，會覺得其實到咗呢個年紀，不如試試其他地方做嘢，同埋會問自己究竟搵一個穩定人工重要定係人生搵到快樂重要？人生苦短，點解唔去搵快樂呢？」同年12月，陳國邦突然回巢無綫與毛舜筠（毛毛）拍攝處境劇，即被指「反口覆舌」，羅敏莊表示願意為老公負上全部責任，她說：「罪魁禍首一定係我，呢件事阿邦真係拒絕咗好多次，我有同佢商量好多次，毛姐亦都打好多電話嚟，話如果陳國邦唔做，佢都唔做，我相信毛姐唔會隨便同其他人講呢啲說話，係一份情義，係我同毛姐一齊說服佢。」Mimi承認曾與老公為「回巢」無綫一事鬧交，她說：「佢話當初係我叫佢離開，羅敏莊你反口覆舌，我哋為呢件事鬧過好多次交，所以大家要鬧就鬧我，反口覆舌係我。」